CAE O TELÓN

A última actividade que a biblioteca acolleu durante este curso 2022-2023 tivo lugar na sala do edificio das Mariñas, onde o grupo de teatro de galego e portugués, creado ao abeiro dos Contratos Programa, estreou dúas obras: O drama do cabalo de axedrez, de Rafael Dieste, e unha adaptación da peza inaugural da nosa dramaturxia: o Entremés famoso sobre da pesca do río Miño. 

Aquí podes ver un pequeno resumo fotográfico:

JULIA DOPICO NO CLUB DE ADULTOS

 Julia Dopico, escritora e profesora de Música do noso centro, visitou o club de lectura de adultos na súa última xuntanza deste curso, para departir con eles sobre o seu poemario La voz de la musa

PLANETA PRINCIPIÑO

A partir das citas da lectura desta obra escollidas no club de adultos e coa axuda do alumnado de francés, creamos este  móbil na biblioteca que acompaña a exposición d'O Principiño en diferentes idiomas.

DESPEDIMOS OS NOSOS COLEÓPTEROS FAVORITOS

Hoxe a biblioteca pechou para dar acollida, un curso máis, á festa de despedida dos vagalumes.

As lecturas foron moitas e variadas, igual que as viandas escollidas e relacionadas con elas: Bertie botts de Harry Potter, té xeado da familia Holmes, estrelas no vento, ollos de Polifemo e mosaikós grego traído das viaxes de Ulises, violetas das Mulleres planta, pantasmas de Canterville, dedos de zombis traídos por Frankenstein dunha Apocalipse Z e xugo da nosa Planta de laranxa lima.

Agora imos voar para seguir lendo noutros lugares, pero a Bibliotrabe espéravos de volta en setembro.